ਜੀਭ ਦਿਆ ਕੱਚਿਆ

[BaBBu]

ਜੀਭ ਦਿਆ ਕੱਚਿਆ,
ਕੀਤਾ ਕੌਲ ਹਾਰਿਓ ਈ ।
ਮੇਰਾ ਅੱਗਾ ਮਾਰਿਓ ਈ ।
ਛਡਿਓ ਈ ਮੈਨੂੰ ਕਿਸੇ ਪਾਸੇ ਵੀ ਨਾ ਜਾਣ ਜੋਗੀ
ਕਿਸੇ ਨਾ ਜਹਾਨ ਜੋਗੀ,
ਹਾਣ ਦੀਆਂ ਕੁੜੀਆਂ ਨੂੰ ਮੂੰਹ ਦਿਖਲਾਣ ਜੋਗੀ ।
ਤੇਰੇ ਪਿੱਛੇ ਝੱਲੀਆਂ ਮੈਂ ਸੱਭੇ ਬਦਨਾਮੀਆਂ ।
ਘਰ ਦੀਆਂ ਝਿੜਕਾਂ,
ਅਜ ਮੈਨੂੰ ਪਤਾ ਲੱਗਾ,
ਦੁਧ ਦੇ ਭੁਲੇਖੇ ਮੈਂ ਤਾਂ ਪਾਣੀ ਪਈ ਰਿੜਕਾਂ ।
ਝੂਠਿਆ ਜਹਾਨ ਦਿਆ ।
ਤੇਰੇ ਆਖੇ ਲੱਗ ਕੇ ਮੈਂ,
ਮੂੰਹੋਂ ਆਪ ਬੋਲ ਕੇ ਮੈਂ ਮਾਪਿਆਂ ਦੀ ਮੰਗ ਛੱਡੀ ।
ਉਹਨਾਂ ਦੀ ਮੈਂ ਨੱਕ ਵੱਢੀ ।
ਘੋੜੀ ਉਤੇ ਚੜ੍ਹ ਬੈਠੋਂ ਸ਼ਰਮ ਨਾ ਆਂਦੀ ਤੈਨੂੰ,
ਹੁਣ ਦਿਹ ਜਵਾਬ ਮੈਨੂੰ ।
ਸਾਡੇ ਨਾਲੋਂ ਵੱਡਾ ਕੋਈ ਝੁਗਾ ਵੀ ਨਾ ਦੇਖ ਭੁੱਲੋਂ ।
ਭੋਇੰ ਭਾਂਡੇ ਵਲੋਂ ਅਸੀਂ ਕਿਸੇ ਨਾਲੋਂ ਘੱਟ ਨਹੀਂ ਸਾਂ ।
ਅਸੀਂ ਕਿਹੜਾ ਜੱਟ ਨਹੀਂ ਸਾਂ ।
ਥੁਕ ਕੇ ਤੇ ਚੱਟਿਓ ਈ ।
ਰੱਬ ਕੋਲੋਂ ਪਾਏਂ,
ਸ਼ਾਲਾ ਅੱਗੇ ਆਵੇ ਅਪਣੇ ਈਂ ।
ਜਿਹਾ ਸਾਨੂੰ ਪੱਟਿਓ ਈ ।