Bhardwaj Ramesh
Member
ਗਜ਼ਲ
ਐ ਜਾਬਰ ਸਾਨੂੰ ਅਜ਼ਮਾ ਕੇ ਵੇਖ ਲਵੀਂ i
ਖੜ ਜਾਵਾਂਗੇ ਰੋਜ ਗਿਰਾ ਕੇ ਵੇਖ ਲਵੀਂ i
ਕੱਲ ਦਾ ਸੂਰਜ ਸਾਡੇ ਹੱਕ ਵਿਚ ਉੱਗੇਗਾ,
ਭਾਵੇਂ ਤੂੰ ਨ੍ਹੇਰੇ ਭੜਕਾ ਕੇ ਵੇਖ ਲਵੀਂ i
ਤੈਥੋਂ ਹੁਣ ਸੁਕਰਾਤ ਸਮੇ ਦੇ ਨਈ ਮਰਨੇ,
ਭਾਵੇ ਸਾਨੂੰ ਜ਼ਹਿਰ ਪਿਲਾ ਕੇ ਵੇਖ ਲਵੀਂ i
ਜੇ ਤੂੰ ਪੱਥਰ ਅਸਾਂ ਵੀ ਕਿਰਚਾਂ ਬਣ ਜਾਣਾ,
ਸ਼ੀਸ਼ੇ ਦੇ ਨਾਲ ਤੂੰ ਟਕਰਾ ਕੇ ਵੇਖ ਲਵੀਂ i
ਪਿਆਰ ਦਾ ਪੰਛੀ ਰਹਿਣਾ ਹੁਣ ਆਜਾਦ ਸਦਾ,
ਨਫਰਤ ਦੇ ਤੂੰ ਜਾਲ ਵਿਛਾ ਕੇ ਵੇਖ ਲਵੀਂ i
ਖੋਹ ਨ੍ਹੀ ਸਕਦਾ ਕਲੀਆਂ ਦੀ ਮੁਸਕਾਨ ਕਦੇ,
ਭਾਵੇਂ ਗੁਲਸ਼ਨ ਨੂੰ ਅੱਗ ਲਾ ਕੇ ਵੇਖ ਲਵੀਂ i
ਪਹੁੰਚ ਹੀ ਜਾਣਾ ਆਖਿਰ ਆਪਾਂ ਮੰਜ਼ਿਲ ਤੇ,
ਰਸਤਿਆਂ ਤੋਂ ਸਾਨੂੰ ਭਟਕਾ ਕੇ ਵੇਖ ਲਵੀਂ i
ਤੇਰੇ ਵਾਰਸ ਤਰਸਣਗੇ ਨਿਤ ਛਾਵਾਂ ਨੂੰ,
ਬਿਨ ਸੋਚੇਂ ਤੂੰ ਰੁੱਖ ਕਟਾ ਕੇ ਵੇਖ ਲਵੀਂ i
ਐ ਬੁਜ਼ਦਿਲ ਤੂੰ ਜਿੰਦਾ ਦਿਲ ਵੀ ਵੇਖੇਂਗਾ,
ਝੁਗੀਆਂ ਵਿਚ ਇਕ ਰਾਤ ਬਿਤਾ ਕੇ ਵੇਖ ਲਵੀਂ i
ਆਰ.ਬੀ.ਸੋਹਲ