shanabha
VIP
ਕੁੜੀਆਂ ਮੁੰਡੇ ਜਦੋਂ ਇਕੱਠੇ ਖੇਡਦੇ ਹੁੰਦੇ ਸੀ ।
ਮੈਂ ਤੇ ਗੁੱਡੀ ਅਕਸਰ ਸਾਥੀ ਨੇੜਦੇ ਹੁੰਦੇ ਸੀ ।
ਢਿਲਕੀ ਜਿਹੀ ਨੀਕਰ ਉਹਦੇ ਹੁੰਦੀ ਫਰਾਕ ਸੀ ।
ਇਹ ਓਦੋਂ ਦੀ ਐ ਗੱਲ ਜਦੋਂ ਮੈਂ ਅਜੇ ਜਵਾਕ ਸੀ ।।
ਮਾਂਊ ਕੋਲੋਂ ਜਦ ਮੈਨੂੰ ਬੜਾ ਹੀ ਡਰ ਲੱਗਦਾ ਸੀ ।
ਧਰਮਸ਼ਾਲਾ ਖੂਹ ਵਾਲੀ ਆਪਣਾ ਹੀ ਘਰ ਲਗਦਾ ਸੀ ।
ਬੰਟਿਆਂ ਦੇ ਨਾਲ ਖੇਡਦੇ ਜਿੱਥੇ ਪਿੱਲ-ਚਟਾਕ ਸੀ ।
ਇਹ ਓਦੋਂ ਦੀ ਐ ਗੱਲ ਜਦੋਂ ਮੈਂ ਅਜੇ ਜਵਾਕ ਸੀ ।।
ਪੀਂ ਹੁੰਦੀ ਸੀ ਮੇਰੇ ਲਈ ਹਰ ਮੋਟਰ ਕਾਰ ਜਦੋਂ ।
ਛੱਪੜ ਤੇ ਵੀ ਨਹਾ ਆਉਦੇ ਸੀ ਕਈ ਕਈ ਵਾਰ ਜਦੋਂ ।
ਘਰੇ ਪਤਾ ਨਾ ਲੱਗੇ ਬਣਦੇ ਬੜੇ ਚਲਾਕ ਸੀ ।
ਇਹ ਓਦੋਂ ਦੀ ਐ ਗੱਲ ਜਦੋਂ ਮੈਂ ਅਜੇ ਜਵਾਕ ਸੀ ।।
ਰੋਜ਼ ਪਤੰਗਾਂ ਲੈ ਆਉਦੇ ਸੀ ਨਵੀਆਂ ਚਮਕਦੀਆਂ ।
ਝੱਗੇ ਨਾਲ ਹੀ ਪੂੰਝ ਲੈਦੇ ਸੀ ਨਲੀਆਂ ਲਮਕਦੀਆਂ ।
ਟਾਇਰ ਸਾਈਕਲ ਦਾ ਡੰਡੇ ਨਾਲ ਬਣਾਉਦੇ ਡਾਕ ਸੀ ।
ਇਹ ਓਦੋਂ ਦੀ ਐ ਗੱਲ ਜਦੋਂ ਮੈਂ ਅਜੇ ਜਵਾਕ ਸੀ ।।
ਧੇਲੀ ਦੀ ਲੈ ਕੇ ਚੀਜ ਸੀ ਰੂੰਘਾ ਮੰਗਦੇ ਹੱਟੀ ਤੋ ।
ਦਾਣੇ ਭੰਨਵਾਉਣ ਵੀ ਜਾਦੇ ਸਾਂ ਮਹਿਰਿਆਂ ਦੀ ਭੱਠੀ ਤੋਂ ।
ਕੁੱਟ ਖਾ ਕੇ ਦੁੱਧ ਪੀਣਾ ਨਿੱਤ ਦੀ ਮੇਰੀ ਖੁਰਾਕ ਸੀ ।
ਇਹ ਓਦੋਂ ਦੀ ਐ ਗੱਲ ਜਦੋਂ ਮੈਂ ਅਜੇ ਜਵਾਕ ਸੀ ।।
ਮੱਕੀ ਦੀ ਰੋਟੀ ਤੇ ਅੰਬ ਦਾ ਆਚਾਰ ਘਸਾ ਲੈਦਾ ।
ਪੋਪਲਾ ਜਿਹਾ ਬਣਾ ਕੇ ਭੱਜਿਆ ਜਾਂਦਾ ਈ ਖਾ ਲੈਦਾ ।
ਘੋਲੀਏ ਦਾ ਜਰਨੈਲ ਨਾ ਸੁਣਦਾ ਮਾਂ ਦੀ ਹਾਕ ਸੀ ।
ਇਹ ਓਦੋਂ ਦੀ ਐ ਗੱਲ ਜਦੋਂ ਮੈਂ ਹਾਲੇ ਜਵਾਕ ਸੀ ।।
Writer- unknown
