ਸਵੇਰ ਆਈ

[BaBBu]

ਨਵੀਂ ਨੀ ਸਵੇਰ ਆਈ ਹਾ ਹਾ ਹਾ
ਨਵੀਂ ਨੀ ਸਵੇਰ ਆਈ ਹੋ ਹੋ ਹੋ

ਕੋਈ ਵੀ ਨਾ ਰਹਿਣਾ ਹੁਣ ਬੇਰੁਜ਼ਗਾਰ
ਅਨਪੜ੍ਹਤਾ ਨੂੰ ਕੋਈ ਮਿਲਣੀ ਨਾ ਠਾਰ੍ਹ
ਰੱਤ ਸਾਡੇ ਸੂਰਮਿਆਂ ਦਾ
ਚੜ੍ਹਦੇ ਦੇ ਪੱਤਣਾਂ ਤੇ
ਲਾਲੀ ਨੀ ਖਲੇਰ ਆਈ ਹਾ ਹਾ ਹਾ
ਨਵੀਂ ਨੀ ਸਵੇਰ ਆਈ ਹੋ ਹੋ ਹੋ ।

ਜਾਮ ਤੋਂ ਵੀ ਵੱਧ ਇਹ ਸੰਭਾਲਣਾ ਹੈ ਨੂਰ
ਡੰਡੀਆਂ ਨੇ ਲੱਭ ਪਈਆਂ ਮੰਜ਼ਲਾਂ ਨੇ ਦੂਰ
ਯਾਦ ਨੀ ਪਿਆਰੀ ਉਨ੍ਹਾਂ
ਡੁੱਬੇ ਹੋਏ ਸੂਰਜਾਂ ਦੀ
ਬਣ ਕੇ ਉਸ਼ੇਰ ਆਈ ਹਾ ਹਾ ਹਾ
ਨਵੀਂ ਨੀ ਸਵੇਰ ਆਈ ਹੋ ਹੋ ਹੋ

ਲੋਟੂਆਂ ਤੇ ਜ਼ਾਲਮਾਂ ਦਾ ਜੁੱਗ ਰਿਹਾ ਬੀਤ
ਮਹਿਲਾਂ ਵਿਚ ਜਾਗਦੇ ਨੇ ਪੈਲੀਆਂ ਦੇ ਗੀਤ
ਹੱਥਾਂ ਦੀ ਹੈ ਏਕਤਾ ਇਹ
ਧਾੜਵੀ ਤੇ ਡਾਕੂਆਂ ਲਈ
ਬਣ ਕੇ ਹਨੇਰ ਆਈ ਹਾ ਹਾ ਹਾ
ਨਵੀਂ ਨੀ ਸਵੇਰ ਆਈ ਹੋ ਹੋ ਹੋ