jo ashk na chhalke aankhon se us ashk ki qeemat hoti hai

[~¤Akash¤~]

Gulshan ki faqat phoolon se nahin, kaanton se bhi zeenat hoti hai
jeene ke liye is duniyaa mein gham ki bhi zaroorat hoti hai

ae waaiz-e-naadaan karta hai tu ek qayaamat ka charcha
yahaan roz nigaahen milti hain, yahaan roz qayaamat hoti hai

woh purshish-e-gham ko aaye hain, kuch keh na sakoon, chup reh na sakoon
khaamosh rahoon to mushkil hai, keh doon to shikaayat hoti hai

karna hi padegaa zapt-e-alam, peene hi padenge yeh aansoo
fariyaad-o-fughaan se ai naadaan, tauheen-e-muhabbat hoti hai

jo aa ke ruke daaman pe 'Saba' woh ashq nahin hai paani hai
jo ashk na chhalke aankhon se us ashk ki qeemat hoti hai