Und3rgr0und J4tt1
Prime VIP
ਦਸਮੇਸ਼ ਤੇਰੀ ਕੌਂਮ ਤੇ,ਝੁੱਲੀਆਂ ਬਥੇਰੀਆਂ..
ਬਚਦੇ ਰਹੇ ਹਾਂ ’ਰਹਿਮਤਾਂ’,
ਸਿਰ ਉੱਤੇ ਤੇਰੀਆਂ..
ਲਿਖਿਆ ਜੋ ਡਾਢਾ ਧੁਰ ਤੋਂ,
ਮੁਕੱਦਰ ਨੇਂ ਮਾਰਿਆ..
ਦਸਮੇਸ਼ ਤੇਰੀ ਕੌਂਮ ਨੂੰ,
ਦੁਸ਼ਮਣ ਨੇ ਮਾਰਿਆ ਕਦੇ ਰਹਿਬਰ ਨੇਂ ਮਾਰਿਆ..||
ਆਪੋ ਚ’ ਲੜੇ ਬਾਜ਼,
ਫ਼ਿਰ ਬਿੱਲੀ ਨੇਂ ਮਾਰਿਆ..
ਅੰਮ੍ਰਿਤਸਰ ਆਈ ਤੇੜ,
ਤਾਂ ਦਿੱਲੀ ਨੇਂ ਮਾਰਿਆ..
ਹੋ ਕੇ ਜ਼ਲੀਲ ਆਪਣੇ ਤੋਂ,
ਆਪਣੇ ਘਰੇ..
ਆਪਣੇ-ਪਰਾਏ ਦੋਵਾਂ ਦੀ,
ਖਿੱਲੀ ਨੇਂ ਮਾਰਿਆ..
ਅੱਜ ਲਹੇ ਬਾਝੋਂ ਝੁਕ ਗਿਆ,
ਉਸ ਸਿਰ ਨੇਂ ਮਾਰਿਆ..
ਦਸਮੇਸ਼ ਤੇਰੀ ਕੌਂਮ ਨੂੰ,
ਦੁਸ਼ਮਣ ਨੇ ਮਾਰਿਆ ਕਦੇ ਰਹਿਬਰ ਨੇਂ ਮਾਰਿਆ..||
ਬੁੱਕਲ ਦੇ ਸੱਪ ਅਸਾਂ ਤੋਂ,
ਸਾਂਭੇ ਨਾਂ ਜਾਂਵਦੇ..
ਆਪੇ ਚਿਰਾਗ ਬਾਲ੍ਹ ਕੇ,
ਆਪੇ ਬੁਝਾਵਂਦੇ..
ਬੇੜੀ ਦਾ ਰਾਖਾ ਰੱਬ ਜੇ,
ਤੂਫ਼ਾਨ ਵਿੱਚ ਮਲਾਹ..
ਚੱਪੂ ਹੀ ਇੱਕ-ਦੂਸਰੇ ਤੋਂ,
ਖੋਹੀ ਜਾਂਵਦੇ..
ਆਪੋ ਚ’ ਬੇਯਕੀਨੀ ਦੇ,
ਖੰਜਰ ਨੇ ਮਾਰਿਆ..
ਦਸਮੇਸ਼ ਤੇਰੀ ਕੌਂਮ ਨੂੰ,
ਦੁਸ਼ਮਣ ਨੇ ਮਾਰਿਆ ਕਦੇ ਰਹਿਬਰ ਨੇਂ ਮਾਰਿਆ..||
ਭੋਲੇ-ਨਿਹੱਕੇ ਪਿਸ ਜਾਂਦੇ,
ਪੁੜ ਵਿੱਚ ਕਨੂੰਨ ਦੇ..
ਇੱਕੋ ਵਤਨ ਚ’ ਮਾਰੇ ਹਾਂ,
ਦੋਹਰੇ ਕਨੂੰਨ ਦੇ..
ਹੁੰਦਾ ਸਿਤਮ ਇਹ ਹੋਰ ਹੈ,
ਸੌਦਾ ਕੀ ਅਸਾਂ ਨਾਲ,
ਪਾਣੀ ਵੀ ਸਾਨੂੰ ਮਿਲਦਾ ਏ,
ਬਦਲੇ ਚ’ ਖੂਨ ਦੇ..
ਪਾਣੀ ਬਿਨ੍ਹ ਹੋਈ ਜ਼ਮੀਨ,
ਬੰਜਰ ਨੇਂ ਮਾਰਿਆ..
ਦਸਮੇਸ਼ ਤੇਰੀ ਕੌਂਮ ਨੂੰ,
ਦੁਸ਼ਮਣ ਨੇ ਮਾਰਿਆ ਕਦੇ ਰਹਿਬਰ ਨੇਂ ਮਾਰਿਆ..||
ਚਾਦਰ ਤਣੀ ਹੈ ਬਹੁਤਿਆਂ,
ਮੂੰਹਾਂ ਤੇ ਭੇਖ ਦੀ..
ਸਾਨੂੰ ਤਮਾਸ਼ੇ ਵਾਂਗਰਾਂ,
ਦੁਨੀਆਂ ਹੈ ਵੇਖਦੀ..
ਜਦ ਬੇਗੁਨਾਹ-ਜਵਾਨੀਂ ਦੇ,
ਬਲਦੇ ਕਿਤੇ ਸਿਵੇ..
ਚੰਦਰੀ-ਸਿਆਸਤ ਉਨ੍ਹਾਂ ਤੇ,
ਰੋਟੀ ਹੈ ਸੇਕਦੀ..
ਦੋ ਪਾਸਿਆਂ ਦੇ ਯਾਰ ਨੇਂ,
ਦਿਲਬਰ ਨੇਂ ਮਾਰਿਆ..
ਦਸਮੇਸ਼ ਤੇਰੀ ਕੌਂਮ ਨੂੰ,
ਦੁਸ਼ਮਣ ਨੇ ਮਾਰਿਆ ਕਦੇ ਰਹਿਬਰ ਨੇਂ ਮਾਰਿਆ..||
ਰੱਖਣਾਂ ਨੀ ਕਰਜ਼,
ਪੈ ਜਾਵੇ ਕੁਝ ਵੀ ਸਹਾਰਣਾਂ..
ਤੈਂ ਆਪਣਾ ਲਾਹਿਆ,
ਕੌਂਮ ਨੇਂ ਆਪਣਾ ਉਤਾਰਣਾਂ..
ਮੁੱਕ ਸਕਦੇ ਹਾਂ ਫ਼ਿਰ ਜੇ,
ਨਜ਼ਰਾਂ ਤੂੰ ਫ਼ੇਰ ਲਏਂ..
"ਦੇਬੀ" ਕੱਲੀ ਮੌਤ ਨੇਂ,
ਸਾਨੂੰ ਕੀ ਮਾਰਣਾਂ..
ਤੇਰੇ ਤੋਂ ਉੱਖੜੀ ਸਾਡੀ ਹੀ,
ਏ ਨਜ਼ਰ ਨੇਂ ਮਾਰਿਆ..
ਦਸਮੇਸ਼ ਤੇਰੀ ਕੌਂਮ ਨੂੰ,
ਦੁਸ਼ਮਣ ਨੇ ਮਾਰਿਆ ਕਦੇ ਰਹਿਬਰ ਨੇਂ ਮਾਰਿਆ..||
