Ajab Khamoshi Si Hai Rooh Main Basi

[~¤Akash¤~]

Ajab Khamoshi Si Hai Rooh Main Basi
Jaisey Lafz beyZubaan Ho Jaaye
Jaisey Ander Kahin Dam Ghutt Raha Ho
Aah Ban Kar Fiza Main Aik Jaan Ho Jaaye


Jaisey Koi Yaqeen Kar k Bhar Paaya Ho
Aur Faqat Apni Zaat Raazdaan Ho Jaaye
Jaisey Aansu Thak K Zameen Bos Ho
Jaisey Dhyaan Bhi Bey Dhayaan Ho Jaaye


Jaisey Aetbaar Ka Aaenaa Gir Kar Tootey
Aur Zindagi Kahin Weeran Ho Jaaye
Jaisey Kuch Na Kehney Ki Qasam Khaii Ho
Apni Hi Awaaz Sun Kar Haeraan Ho Jaaye


Jaisey Khushi Muthhi Main Mehsoos Hoti Ho
Aur Raet Ban Kar Khaak Ka Samaan Ho Jaaye
Jaisey Achanak Lag Jaaye Kisi Ki Buri Nazar
Jaisey Khilta Chaman Bayabaan Ho Jaaye


Jaisey Umeed Ka Aik Nanha Sa Timtimata Diaa
Tez Aandhi Se Tareeki Main Yakjaan Ho Jaaye
Farar Chaahney Se Bhi Na Haasil Ho Sakey
Jaisey Yaad Bin Bulaye Barajaman Ho Jaaye


Jaisey Asman Lamhey Main Naa Meharbaan
Zameen Palak Jhapaktey Anjaan Ho Jaaye
Jaisey Koi Bauhat, Bauhat Hi Apna Ho..
Aur Aik Pal Main Budgumaan Ho Jaaye..!


Jaisey Qaus-E-Qazah Ka Ho Intizaar Faqat
Aur Baarish Hi Aakhrii Armaan Ho Jaaye
Jaisey Gehri Neend Se Aankh Khul Jaaye
Jaisey Phir Khawab Wabal-E-Jaan Ho Jaaye


Ajab Khamoshi Si Hai Rooh Main Basi
Jaisey Lafz beyZubaan Ho Jaaye
Jaisey Ander Kahin Dam Ghutt Raha Ho
Aah Ban Kar Fiza Main Aik Jaan Ho Jaaye..!

Haya