ਮੇਰੇ ਖ਼ਿਆਲ ਜਿਸ ਜਲਾਏ ਉਸ ਸਿਤਮ ਦਾ ਕੀ ਕਰਾਂ

[BaBBu]

ਮੇਰੇ ਖ਼ਿਆਲ ਜਿਸ ਜਲਾਏ ਉਸ ਸਿਤਮ ਦਾ ਕੀ ਕਰਾਂ
ਬਿਨ ਦਰਦ ਜਾਣਿਆਂ ਲਾ ਦਿੱਤੀ ਇਸ ਮਰ੍ਹਮ ਦਾ ਕੀ ਕਰਾਂ

ਹੰਝੂਆਂ ਨਾਲ ਜ਼ਖ਼ਮ ਧੋਤੇ ਕੀਤੇ ਜੋ ਗ਼ਮ ਤੇਰੇ,
ਤੈਨੂੰ ਹਸਦਿਆਂ ਵੇਖ ਹੋਏ ਇਸ ਜ਼ਖ਼ਮ ਦਾ ਕੀ ਕਰਾਂ

ਰੁੱਤ ਬਹਾਰਾਂ ਦੀ ਸਦਾ ਰਹਿਣੀ ਏਂ ਦਿਲ ਫ਼ਰੇਬ,
ਜਿਹਦੀ ਨਾਲ ਖ਼ਿਜਾਂ ਯਾਰੀ ਉਸ ਚਮਨ ਦਾ ਕੀ ਕਰਾਂ

ਨਾਲ ਖ਼ੂਨ ਦੇ ਨੇ ਭਰੀਆਂ ਮੇਰੇ ਦਿਲ ਦੀਆਂ ਰਗਾਂ,
ਮੈਨੂੰ ਸੰਗ-ਦਿਲ ਜੋ ਮਿਲਿਆ ਉਸ ਸਨਮ ਦਾ ਕੀ ਕਰਾਂ

ਹੰਝੂਆਂ ਨੇ ਪਰੋਈ ਮਾਲਾ ਕਰ ਰਹੇ ਤੇਰੀ ਉਡੀਕ,
ਆਵੇਂਗਾ ਕਦੇ ਨਾ ਕਦੇ ਇਸ ਵਹਿਮ ਦਾ ਕੀ ਕਰਾਂ

ਮੈਨੂੰ ਗੱਲਾਂ ਸੱਭੇ ਯਾਦ ਨੇ ਤੇ ਹਰ 'ਨਹੀਂ' ਤੇਰੀ,
ਤੇਰੇ ਸ਼ਹਿਰ ਵੱਲ ਨੂੰ ਜਾਂਦੈ ਇਸ ਕਦਮ ਦਾ ਕੀ ਕਰਾਂ

ਨਾ ਤੂੰ ਜੀਣ ਸਮੇਂ ਆਇਉਂ, ਨਾ ਤੂੰ ਮਰਨ ਸਮੇਂ ਆਇਉਂ,
ਸਿਵਾ ਬਾਲਣੇ ਨੂੰ ਆਇਉਂ ਇਸ ਰਹਿਮ ਦਾ ਕੀ ਕਰਾਂ