ਸੁਪਨਿਆਂ ਦੇ ਜਲਣ ਤੇ ਮੇਰੇ ਗੀਤਾਂ ਦਾ ਸਿਰ ਦੁਖੇ

BaBBu

Prime VIP
ਸੁਪਨਿਆਂ ਦੇ ਜਲਣ ਤੇ ਮੇਰੇ ਗੀਤਾਂ ਦਾ ਸਿਰ ਦੁਖੇ ।
ਖਿੜਦੇ ਫੁੱਲ ਝੜਨ ਤੇ ਮੇਰੇ ਗੀਤਾਂ ਦਾ ਸਿਰ ਦੁਖੇ ।

ਲੋਕੀਂ ਮੈਥੋਂ ਪੁੱਛਦੇ ਨੇ 'ਤੂੰ ਕਿਉਂ ਉਦਾਸ ਹੈਂ'?
ਮੈਂ ਕਿੰਝ ਸਮਝਾ ਦਿਆਂ ਮੇਰੇ ਗੀਤਾਂ ਦਾ ਸਿਰ ਦੁਖੇ ।

ਤੂੰ ਆਪ ਬੀਜੀ ਜੋ ਉਹ ਕਿਸੇ ਨੇ ਵੱਢ ਲਈ ;
ਤੇਰੇ ਇਹ ਜਰਨ ਤੇ ਮੇਰੇ ਗੀਤਾਂ ਦਾ ਸਿਰ ਦੁਖੇ ।

ਮੇਰੀ ਤੇ ਉਹਦੀ ਪ੍ਰੀਤ ਕਿਦਾਂ ਮੈਂਨੂੰ ਖੁਸ਼ ਕਰੇ ;
ਲੱਖਾਂ ਸਿਵੇ ਬਲਣ ਤੇ ਮੇਰੇ ਗੀਤਾਂ ਦਾ ਸਿਰ ਦੁਖੇ ।

ਤੇਰੇ ਦੋਸਤ ਨੇ ਜਾਂ ਪਿੱਛੋਂ ਤੈਨੂੰ ਛੁਰਾ ਮਾਰਿਆ ;
ਤੇਰੇ ਇੰਝ ਮਰਨ ਤੇ ਮੇਰੇ ਗੀਤਾਂ ਦਾ ਸਿਰ ਦੁਖੇ ।

ਜੇ ਬਣਾਉਣਾ ਹੀ ਏਂ ਤੂੰ ਲੋਹੇ ਦਾ ਕੁੱਝ ਬਣਾ ;
ਰੇਤੇ ਦੇ ਖਰਨ ਤੇ ਮੇਰੇ ਗੀਤਾਂ ਦਾ ਸਿਰ ਦੁਖੇ ।

ਇੱਕ ਹਨੇਰੀ ਆਣ ਤੇ ਤੂੰ ਘਾਹ ਜਿਉਂ ਵਿਛ ਗਿਉਂ ;
ਉੱਤੇ ਪੈਰ ਧਰਨ ਤੇ ਮੇਰੇ ਗੀਤਾਂ ਦਾ ਸਿਰ ਦੁਖੇ ।

ਤੇਰੇ ਕੰਨੀਂ ਬੰਨ੍ਹਿਆਂ ਸੀ ਉਹ ਰਾਹ ਵਿੱਚ ਖੁਲ੍ਹ ਗਿਆ ;
ਤੇਰੇ ਹੌਕੇ ਭਰਨ ਤੇ ਮੇਰੇ ਗੀਤਾਂ ਦਾ ਸਿਰ ਦੁਖੇ ।

ਗੱਲਾਂ ਕਿਸ ਤਰਾਂ ਕਰੇਂ, ਗੱਲਾਂ ਇਸ ਤਰਾਂ ਤੂੰ ਕਰ ;
ਜਿਨ੍ਹਾਂ ਦੇ ਕਰਨ ਤੇ ਨਾ ਮੇਰੇ ਗੀਤਾਂ ਦਾ ਸਿਰ ਦੁਖੇ ।

ਜਿਗਰ ਚੀਰ ਕੇ ਵਿਖਾ ਕਿਤੋਂ ਚਾਨਣਾ ਲਿਆ ;
ਤੇਰੇ ਇੰਝ ਮਰਨ ਤੇ ਨਾ ਮੇਰੇ ਗੀਤਾਂ ਦਾ ਸਿਰ ਦੁਖੇ ।
 
Top