ਤੇਰਾ ਮੇਰਾ ਇਕ ਰਿਸ਼ਤਾ ਹੈ, ਪਰ ਇਹ ਰਿਸ਼ਤਾ, ਕੀ ਰਿਸ਼ਤਾ

BaBBu

Prime VIP
ਤੇਰਾ ਮੇਰਾ ਇਕ ਰਿਸ਼ਤਾ ਹੈ, ਪਰ ਇਹ ਰਿਸ਼ਤਾ, ਕੀ ਰਿਸ਼ਤਾ।
ਭਟਕ ਰਹੀ ਆਵਾਜ਼ ਹਾਂ ਮੈਂ ਇਕ, ਤੂੰ ਇਕ ਘੋਰ ਅਸੀਮ ਖ਼ਲਾ।

ਜਿੰਨੀ ਦੇਰ ਰਹੇ ਹਾਂ ਨੰਗੇ, ਸੂਰਜ ਧਰਤੀ ਨੇੜ ਰਿਹੈ,
ਸਾਨੂੰ ਕੀ ਜੇ ਸਾਡੇ ਪਿੱਛੋ, ਰੰਗ ਬਦਲਿਆ ਧੁੱਪਾਂ ਦਾ।

ਸ਼ਬਦਾਂ, ਰੰਗਾਂ, ਆਵਾਜ਼ਾਂ ਦੇ, ਸਾਰੇ ਹੀਲੇ ਅਸਫ਼ਲ ਨੇ,
ਦਿਲ ਦੇ ਹਾਦਸਿਆਂ ਦੀ ਕਿਹੜਾ, ਸਕਦਾ ਹੈ ਤਸਵੀਰ ਬਣਾ।

ਖ਼ਬਰੇ ਲੋਕੀ ਸਹਿਰਾਵਾਂ ਵਿਚ, ਕੀਕੂੰ ਚਸ਼ਮੇ ਲਭ ਲੈਂਦੇ
ਸਾਨੂੰ ਤਾਂ ਦਰਿਆਵਾਂ ਵਿਚ ਵੀ ਰੇਤਾ ਹੀ ਰੇਤਾ ਮਿਲਿਆ।

ਤੇਰੀ ਹੋਂਦ ਹਨੇਰੇ ਅੰਦਰ, ਗੁੰਮਦੀ ਗੁੰਮਦੀ ਗੁੰਮ ਹੋਈ,
ਤੇਰਾ ਹਰ ਇਕ ਪਗ-ਚਿੰਨ੍ਹ ਹੈ ਪਰ, ਸੂਰਜ ਵਾਂਗੂੰ ਚਮਕ ਰਿਹਾ।

ਹੁਣ ਇਸ ਗੱਲ ਤੋਂ ਡਰਦੇ ਹਾਂ ਕਿ, ਘ੍ਹਾ ਵਿਚ ਕਿਧਰੇ ਸੱਪ ਨਾ ਹੋਵੇ,
ਇਕ ਵੇਲਾ ਸੀ ਦੂਰ ਦੂਰ ਤੱਕ, ਘ੍ਹਾ ਦਾ ਨਾ ਸੀ ਅਤਾ ਪਤਾ।
 
Top