ਗੱਡੀ ਦੇ ਵਿਚ ਫੜ ਲਈ, ਘਰ ਭੁਲ ਆਈ ਪਾਸ

BaBBu

Prime VIP
ਗੱਡੀ ਦੇ ਵਿਚ ਫੜ ਲਈ, ਘਰ ਭੁਲ ਆਈ ਪਾਸ।
ਉੱਤੋਂ ਤੀਹ ਤਰੀਕ ਸੀ, ਖ਼ਾਲੀ ਪਰਸ ਉਦਾਸ ।

ਬਾਬੇ ਨੂੰ ਕੀ ਸੀ ਪਤਾ, ਅਗਿਆਨੀ ਤੇ ਮੂੜ੍ਹ,
ਕੁਰਸੀ ਖ਼ਾਤਿਰ ਰਟਣਗੇ ਜਪੁਜੀ ਤੇ ਰਹਿਰਾਸ।

ਮੁੰਡੇ ਕੁੜੀਆਂ ਸਮਝਦੇ, ਉਸ ਨੂੰ ਇਕ ਕਲਾੳੁਨ,
ਉਹ ਸਮਝੇ ਲਮਦਾੜ੍ਹੀਆ, ਮੈਂ ਹਾਂ ਕਾਲੀ ਦਾਸ।

ਨਾ ਜਮਨਾ ਨਾ ਕਾਨ੍ਹ ਜੀ, ਪਰ ਹਰ ਦਫ਼ਤਰ ਵਿਚ,
ਤਰ੍ਹਾਂ ਤਰ੍ਹਾਂ ਦੀਆਂ ਗੋਪੀਆਂ, ਭਾਂਤ ਭਾਂਤ ਦੀ ਰਾਸ।

ਚੁਪ ਦਾ ਪਹਿਰਾ ਲੱਗਿਆ, ਹੋੜੇ ਹਟਕੇ ਕੌਣ,
ਕੁੱਤੇ ਆਟਾ ਚੱਟਦੇ, ਵਗਦਾ ਪਿਆ ਖਰਾਸ।

ਆਖ਼ਰ ਸਬਜ਼ ਕਬੂਤਰੀ, ਛਤਰੀ ਬੈਠੀ ਆ,
ਪੈਂਦੀ ਪੈਂਦੀ ਪੈ ਗਈ, ਪੱਥਰ ਉਤੇ ਘਾਸ।

ਚਾਰ ਕੁ ਦੋਹੇ ਜੋੜ ਕੇ,ਚੰਡੀਗੜ੍ਹ ਵਿਚ ਬੈਠ,
ਇਕ ਜੱਟਾਂ ਦਾ ਛੋਕਰਾ, ਬਣਿਆ ਤੁਲਸੀ ਦਾਸ।

'ਰਾਜਗੁਮਾਲੋਂ' ਆ ਗਿਐ, ਮੈਲਾ ਖ਼ਤ ਬੇਰੰਗ,
ਲਿਖਿਆ ਕਦ 'ਜਗਤਾਰ' ਜੀ, ਮੁਕਣਾ ਹੈ ਬਨਵਾਸ ।
 
Top