ਅੱਖੀਆਂ ਦੀ ਝੀਲ


ਅੱਖੀਆਂ ਦੀ ਝੀਲ ‘ਚ, ਕਿਨਾਰੇ ਲਭਦੇ ਹੋ i
ਜਿੰਦਗੀ ਦੀ ਜੰਗ ਲਈ, ਸਹਾਰੇ ਲਭਦੇ ਹੋ i

ਵੱਢ਼ ਦਿੱਤਾ ਰੱਸਾ ਹੱਥੀਂ, ਪਿਆਰ ਵਾਲਾ ਆਪੇ,
ਹੁਣ ਤੁਸੀਂ ਪੀਂਘ ਦੇ, ਹੁਲਾਰੇ ਲਭਦੇ ਹੋ i

ਤੁਰੇ ਨਹੀਂ ਨਾਲ ਲੈ ਕੇ, ਰਾਹਗੀਰ ਨੂੰ ਵੀ,
ਰਾਹ ਵਿਚ ਮਿਲੇ ਜੋ, ਇਸ਼ਾਰੇ ਲਭਦੇ ਹੋ i

ਖੂਨੀਆਂ ਦੇ ਨਾਲ ਸਧਾ, ਭਾਈਵਾਲ ਰਹੇ,
ਖੰਜਰ ਛੁਪਾ ਕੇ, ਹਤਿਆਰੇ ਲਭਦੇ ਹੋ i

ਰਾਹਾਂ ਵਿਚ ਡਿਗ ਕੇ, ਨਾ ਉਠਣਾ ਹੀ ਸਿਖੇ,
ਸਬਰਾਂ ਦੇ ਪੈਂਡੇ ਤੁਸੀਂ, ਹਾਰੇ ਲਭਦੇ ਹੋ i

ਅੱਖੀਂਆਂ ‘ਚੋਂ ਕੇਰ ਦਿੱਤੇ, ਪਿਆਰ ਵਾਲੇ ਮੋਤੀ,
ਫੋਲ ਫੋਲ ਮਿੱਟੀ ਉਹ, ਸਿਤਾਰੇ ਲਭਦੇ ਹੋ i

ਅਜਲਾਂ ਤੋਂ ਜਿੱਤ ਸਧਾ, ਵਫ਼ਾ ਦੀ ਹੀ ਹੋਈ,
ਯਾਰ ਲਈ ਸੋਹਲ ਝੂਠੇ, ਲਾਰੇ ਲਭਦੇ ਹੋ i

ਆਰ.ਬੀ.ਸੋਹਲ​
 
Top