ਖੋਟ ਸੋਨਾ ਖ਼ੂਨ ਦੇ ਵਿੱਚ ਖੁਰ ਗਿਆ

[KARAN]

ਖੋਟ ਸੋਨਾ ਖ਼ੂਨ ਦੇ ਵਿੱਚ ਖੁਰ ਗਿਆ
ਤਾਲ ਮਨ ਚੋਂ ਗਲ਼ ਵਿੱਚੋਂ ਉਡ ਸੁਰ ਗਿਆ

ਇਸ਼ਕ ਦੀ ਮੰਜ਼ਿਲ ਅਧੂਰੀ ਰਹਿ ਗਈ
ਠਿੱਲਣੋਂ ਪਹਿਲਾਂ ਹੀ ਕੱਚਾ ਭੁਰ ਗਿਆ


ਵਰਤਮਾਂ ਸੂਰਜ ਦਾ ਕਿਸ ਨੇ ਵੇਖਿਆ
ਵਰਤਮਾਂ ਵਰਤਾ ਕੇ ਉਹ ਤਾਂ ਤੁਰ ਗਿਆ

ਤੀਰ ਵੱਜ ਛਾਤੀ ਤੇ ਖੁੰਢਾ ਹੋ ਗਿਆ
ਬੋਲ ਸਿੱਧਾ ਸੀਨੇ ਅੰਦਰ ਧੁਰ ਗਿਆ

ਇੰਞ ਬੈਠਾ ਚੁੱਪ ਜਿਹਾ ਹੀ ਹੋ ਗਿਆ
ਸ਼ੇਅਰ ਕੋਈ ਫਿਰ ਅਵੱਲਾ ਫੁਰ ਗਿਆ

ਹੱਲੂਵਾਲ਼ ’ਚ ਬੈਠ ਵੱਡਾ ਬਣ ਗਿਆ
ਹੋਰ ਛੱਡ ਅੱਜ ਤਕ ਨਾ ਮਾਹਿਲਪੁਰ ਗਿਆ।
sangtar​