ਗੀਤ

ਲੋਕਤਾ ਤੇ ਸਾਡੀਆਂ ਹੀ ਹਿੰਮਤਾਂ ਦਾ ਜੋੜ ਹੈ ।
ਲੋਕਤਾ ਦੇ ਸਾਂਭਣੇ ਨੂੰ ਏਕਤਾ ਦੀ ਲੋੜ ਹੈ ।

ਦੇਸ਼ ਮਾਂ ਦੀ ਹਿੱਕ 'ਤੇ ਜੋ ਕੌਮੀ ਫ਼ਿਰਕੇਦਾਰੀਆਂ ।
ਸੁਆਰਥਾਂ ਨੇ ਕੀਤੀਆਂ ਜੋ ਵਤਨ 'ਤੇ ਗ਼ਦਾਰੀਆਂ ।
ਨੱਚ ਰਿਹਾ ਜੋ ਦੇਸ਼ 'ਚ ਇਕ ਭੂਤ ਕੌਮੀ ਫੁੱਟ ਦਾ,
ਉਹਨੂੰ ਖਾਰੇ ਸਾਗਰਾਂ 'ਚ ਪਾਵਣੇ ਦੀ ਲੋੜ ਹੈ ।

ਦੁਸ਼ਮਣਾਂ ਦਾ ਵੱਗ ਆ ਸਾਡੀ ਅੰਗੂਰੀ ਕਿਉਂ ਚਰੇ ।
ਦੁਸ਼ਮਣਾਂ ਦੀ ਧੁੱਪ ਨਾਲ ਸਾਡੀ ਚੰਡੂਰੀ ਕਿਉਂ ਸੜੇ ।
ਗ਼ੈਰ ਕਿਉਂ ਦੇਖੇ ਤਮਾਸ਼ਾ ਸਾਡੀ ਅਪੋ ਧਾਪ ਦਾ,
ਮੁਆਮਲੇ ਘਰ ਬੈਠਿਆਂ ਸੁਲਝਾਵਣੇ ਦੀ ਲੋੜ ਹੈ ।

ਹੋ ਚੌਕੰਨਾ ਹਿੰਦੀਆ ਇਹ ਯੁੱਗ ਹੈ ਵਿਗਿਆਨ ਦਾ ।
ਵੈਰੀ ਬਣਾਇਆ ਏਸ ਨੇ ਇਨਸਾਨ ਨੂੰ ਇਨਸਾਨ ਦਾ ।
ਚਾਹੋ ਜੇ ਇਨਸਾਨ 'ਤੇ ਵਿਗਿਆਨ ਨਾ ਭਾਰੂ ਬਣੇ,
ਵਿਗਿਆਨ ਨੂੰ ਵਿਗਿਆਨ ਨਾਲ ਸੁਲਝਾਵਣੇ ਦੀ ਲੋੜ ਹੈ ।

ਵਤਨ ਦੀ ਸਰਹੱਦ 'ਤੇ ਕਿਹੜਾ ਪਿਆ ਲਲਕਾਰਦਾ ।
ਸੁੱਤਿਆਂ ਸ਼ੇਰਾਂ ਦੀ ਕਿਹੜਾ ਅਣਖ ਨੂੰ ਵੰਗਾਰਦਾ ।
ਜੇ ਨਾ ਕੋਈ ਸਮਝਦਾ ਸਾਡੇ ਅਮਨ-ਆਦਰਸ਼ ਨੂੰ,
ਤੇਗ਼ ਫਿਰ ਪਹਿਲੇ ਤਰ੍ਹਾਂ ਚਮਕਾਵਣੇ ਦੀ ਲੋੜ ਹੈ ।