ਤੈਨੂੰ ਕੋਈ ਸਾਰ ਨਹੀਂ

ਤੈਨੂੰ ਕੋਈ ਸਾਰ ਨਹੀਂ

ਤੈਨੂੰ ਕੋਈ ਸਾਰ ਨਹੀਂ ਦਿਲਾਂ ਦਿਆ ਜਾਨੀਆਂ i
ਸਾਂਭੀਆਂ ਮੈਂ ਬਸ ਹੁਣ ਤੇਰੀਆਂ ਨਿਸ਼ਾਨੀਆਂ i

ਲਾ ਕੇ ਸੀਨੇ ਅੱਗ ਅਸਾਂ ਦਿਲ ਤੇਰਾ ਠਾਰਿਆ ,
ਤੇਰੇ ਪਿਛੇ ਚੰਨਾ ਅਸਾਂ ਗਮਾਂ ਨੂੰ ਸਹਾਰਿਆ ,
ਦਿਨ ਰਾਤ ਚੇਤੇ ਹੁਣ ਆਉਂਦੀਆਂ ਕਹਾਣੀਆਂ i
ਸਾਂਭਦੀ ਫਿਰਾਂ ਮੈਂ ਬਸ ਤੇਰੀਆਂ ਨਿਸ਼ਾਨੀਆਂ i

ਹੁਸਨ ਲਾਚਾਰ ਹੁੰਦਾ ਇਸ਼ਕੇ ਦੇ ਵਾਰ ਤੋਂ,
ਰੂਹਾਂ ਨੂੰ ਵਟਾ ਕੇ ਕਦੇ ਡਰੀਦਾ ਨ੍ਹੀ ਹਾਰ ਤੋਂ,
ਲਭੀ ਹੋਈ ਚੀਜ ਨਾ ਗਵਾਈਏ ਕਦੇ ਹਾਣੀਆਂ i
ਸਾਂਭਦੀ ਫਿਰਾਂ ਮੈਂ ਬਸ ਤੇਰੀਆਂ ਨਿਸ਼ਾਨੀਆਂ i

ਦੁਨੀਆਂ ਤੋਂ ਵਖ ਹੋ ਕੇ ਤੇਰੇ ਨਾਲ ਜੋੜੀਆਂ ,
ਗੈਰਾਂ ਪਿਛੇ ਚੰਨਾਂ ਵੇ ਤੂੰ ਸਾਡੇ ਨਾਲ ਤੋੜੀਆਂ,
ਵੈਰ ਦੀਆਂ ਕੰਧਾਂ ਇਕ ਦਿਨ ਡਿਗ ਜਾਣੀਆਂ i
ਸਾਂਭਦੀ ਫਿਰਾਂ ਮੈਂ ਬਸ ਤੇਰੀਆਂ ਨਿਸ਼ਾਨੀਆਂ i

ਤੇਰੀ ਦੀਦ ਬਿਨਾ ਹੁਣ ਅਖੀਆਂ ਨਾ ਸੌਂਦੀਆਂ ,
ਪਲਕਾਂ ਦੇ ਬੂਹੇ ਓਹਲੇ ਬੈਠ ਬੈਠ ਰੋਂਦੀਆਂ ,
ਸੋਹਲ ਤੇਰੇ ਪਿਛੇ ਫਿਰੇ ਵਾਂਗਰਾਂ ਦੀਵਾਨੀਆਂ i
ਸਾਂਭਦੀ ਫਿਰਾਂ ਮੈਂ ਬਸ ਤੇਰੀਆਂ ਨਿਸ਼ਾਨੀਆਂ i

ਆਰ.ਬੀ.ਸੋਹਲ​