ਗੀਤਾਂ ਦੇ ਵਾਰਸ

BaBBu

Prime VIP
ਆ ਮੇਰੇ ਗੀਤਾਂ ਦੇ ਵਾਰਸ
ਆ ਮੇਰੀ ਕੁਝ ਵਾਟ ਵੰਡਾ ।
ਮੈਂ ਹੰਭ ਚੱਲਿਆ ਹਾਂ ਭੰਵਰਾਂ 'ਚੋਂ,
ਕਿਸ਼ਤੀ ਕੰਢਿਆਂ ਨੇੜ ਲਿਜਾ ।

ਇਸ ਵਿਚ ਸੂਹੇ ਸਾਵਣ ਜਿਹੀਆਂ
ਲੱਦੀਆਂ ਕੁੱਝ ਸੱਧਰਾਂ ।
ਜਾਂ ਕੁੱਝ ਵਿਆਜ ਵੀਰਾਂ ਦੇ ਸਿਰ ਦਾ
ਚਾਅ ਜੇ ਤਾਰ ਸਕਾਂ ।
ਆ ਮੇਰੇ ਗੀਤਾਂ ਦੇ ਵਾਰਸ ।
ਆ ਮੇਰੀ..................

ਇਸ ਵਿਚ ਸ਼ਹਿਦ ਉਹਨਾਂ ਬੱਚਿਆਂ ਲਈ
ਜੋ ਪੱਤਲਾਂ ਚੱਟਦੇ ।
ਉਸ ਬਸਤੀ ਦਾ ਚਾਨਣ ਜਿਸ ਤੋਂ,
ਚੰਨ ਪਾਸਾ ਵੱਟਦੇ ।
ਜਿਸ ਦੀ ਮੱਸਿਆ ਪੂਰਨਮਾਸ਼ੀ ਭਾਲੇ ਖੀਰ ਕੜਾਹ
ਆ ਮੇਰੇ ਗੀਤਾਂ ਦੇ ਵਾਰਸ ।
ਆ ਮੇਰੀ..................

ਖਾਣਾਂ ਵਿਚ ਘਿਰਿਆਂ ਦੀਆਂ ਇਸ ਵਿਚ
ਜਿਊਣ ਦੀਆਂ ਸੱਧਰਾਂ ।
ਉਸ ਚੋਗੀ ਦੀ ਪਤ ਜੁ ਚਾਹੁੰਦੀ
ਬੇਪਤ ਨਾ ਪਰਤਾਂ ।
ਕੁਝ ਮੋਇਆਂ ਦੇ ਖ਼ੂਨ ਦੇ ਦੀਵੇ,
ਇਸ ਵਿਚ ਲਿਆ ਟਿਕਾਅ
ਆ ਮੇਰੇ ਗੀਤਾਂ ਦੇ ਵਾਰਸ ।
ਆ ਮੇਰੀ..................

ਮਗਰਮੱਛਾਂ ਤੇ ਤੰਦੂਆਂ ਹੈ ਸਨ
ਰਾਹ ਵਿਚ ਜਾਲ ਤਣੇ ।
ਪਰ ਕਿਸ਼ਤੀ ਮੈਂ ਸਿਰੜ ਸਹਾਰੇ
ਖਿੱਚ ਲਈ ਜਾਲ ਸਣੇ ।
ਮੇਰੇ ਮਨ ਵਿਚ ਯਾਰਾਂ ਦਾ ਹੈ,
ਸਦੀਆਂ ਤੋਂ ਈ ਸ਼ੁਦਾ
ਆ ਮੇਰੇ ਗੀਤਾਂ ਦੇ ਵਾਰਸ
ਆ ਮੇਰੀ ਕੁਝ ਵਾਟ ਵੰਡਾ ।
ਮੈਂ ਹੰਭ ਚੱਲਿਆ ਹਾਂ ਭੰਵਰਾਂ 'ਚੋਂ,
ਕਿਸ਼ਤੀ ਕੰਢਿਆਂ ਨੇੜ ਲਿਜਾ ।
 
Top