Bhardwaj Ramesh
Member
ਆਪਣੇ ਪਰਾਏ ਦੀ ਤੂੰ ਕੀਤੀ ਨਾ ਪਛਾਣ ਵੇ
ਸੂਲੀ ਉੱਤੇ ਟੰਗ ਗਿਆ ਕਾਹਨੂੰ ਮੇਰੀ ਜਾਨ ਵੇ
ਕਿਹਾ ਸੀ ਤੂੰ ਨਿਭ ਜਾਉ ਸਾਡੀ ਤਾਂ ਹਸ਼ਰ ਤਕ
ਕਸਮਾਂ ਤੇ ਵਾਧੇ ਦੱਸ ਕਿਥੇ ਉਹ ਜ਼ੁਬਾਨ ਵੇ
ਬਿਰਹਾ ਦੀ ਅੱਗ ਨਾਲ ਰਿਹਾ ਸਾਡਾ ਰਾਬਤਾ
ਵਸਲਾਂ ਦੀ ਕਿਦਾਂ ਦੱਸ ਹੋਣੀ ਪਹਿਚਾਨ ਵੇ
ਇਸ਼ਕ ਦਾ ਮੁੱਲ ਹੁੰਦਾ ਕੀ ਏ ਤੈਨੂੰ ਪਤਾ ਨਹੀਂ
ਇੱਕ ਪਾਸੇ ਯਾਰ ਦੂਜੇ ਪਾਸੇ ਇਹ ਜਹਾਨ ਵੇ
ਰਹਿੰਦੇ ਜਦੋਂ ਸੱਖਣੇ ਬਨੇਰੇ ਬਿਨਾ ਕਾਗ ਦੇ
ਕਿਸਦੀ ਉਡੀਕ ਕਰਾਂ ਕਿਸ ਉੱਤੇ ਮਾਨ ਵੇ
ਸੱਚੇ ਯਾਰ ਸੱਜਨਾ ਨਸੀਬਾਂ ਨਾਲ ਮਿਲਦੇ
ਰੱਬ ਰੁੱਸ ਜਾਏ ਨਾ ਰੁੱਸੇ ਕਦੀ ਹਾਣ ਵੇ
ਬੁੱਤ ਬੇਜਾਨ ਬਿਨਾ ਰੂਹ ਦੇ ਵਜੂਦ ਤੋਂ
ਕੱਢ ਕੇ ਤੂੰ ਲੈ ਗਿਆ ਏਂ ਸੋਹਲ ਮੇਰੀ ਜਾਨ ਵੇ
ਆਰ.ਬੀ.ਸੋਹਲ
