ਜ਼ਰੂਰੀ ਸੂਚਨਾ--ਅੱਜ ਜਦੋਂ ਤੋਂ ਗਾਇਕ ਯੁੱਧਵੀਰ ਮਾਣਕ ਬਾਰੇ ਲੋਕਾਂ ਨੂੰ ਇਹ ਪਤਾ ਲੱਗਾ ਹੈ ਕਿ ਉਹ ਡੀ. ਐੱਮ.ਸੀ. ਹਸਪਤਾਲ ਵਿਖੇ ਬੜੀ ਸੀਰੀਅਸ ਹਾਲਤ ਵਿੱਚ ਹੈ ਤਾਂ ਉਦੋਂ ਤੋਂ ਹੀ ਪੂਰੀ ਦੁਨੀਆਂ ਦੇ ਸਰੋਤੇ ਫ਼ੇਸਬੁੱਕ ਅਤੇ ਫ਼ੋਨ ਦੇ ਜ਼ਰੀਏ ਇਸ ਦਾ ਕਾਰਨ ਜਾਨਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਹੁਣੇ ਹੀ ਡੀ.ਐੱਮ.ਸੀ ਹਸਪਤਾਲ ਵਿੱਚੋਂ ਗਾਇਕ ਗਿੱਪੀ ਗਰੇਵਾਲ ਦਾ ਫ਼ੋਨ ਆਇਆ ਹੈ ਤੇ ਉਸਨੇ ਉੱਥੇ ਮੌਜੂਦ ਸ੍ਰੀ ਨਿਰਮਲ ਜੌੜਾ ਜੀ ਨਾਲ ਗੱਲ ਕਰਵਾਈ ਤਾਂ ਉਹਨਾਂ ਦੱਸਿਆ ਕਿ ਯੁੱਧਵੀਰ ਕੁਝ ਦਿਨਾਂ ਤੋਂ ਪੀਲੀਏ ਤੋਂ ਪੀੜਿਤ ਸੀ ਜਿਸ ਕਰਕੇ ਉਸਨੇ ਜੋ ਦਵਾਈ ਲਈ ਉਸ ਨਾਲ ਉਸਦੇ ਖ਼ੂਨ ਦਾ ਦਬਾਓ ਵਧ ਗਿਆ। ਉਸ ਦਬਾਓ ਨਾਲ ਉਸਦੇ ਖ਼ੂਨ ਦਾ ਇੱਕ ਕਤਰਾ (ਕਲੌਟ) ਉਸਦੇ ਬਰੇਨ ਵਿੱਚ ਉਸ ਜਗ੍ਹਾ ਚਲਾ ਗਿਆ ਹੈ ਜਿੱਥੇ ਕਿ ਡਾਕਟਰਾਂ ਅਨੁਸਾਰ ਓਪਰੇਸ਼ਨ ਕਰਨਾ ਸੰਭਵ ਨਹੀਂ ਹੈ । ਉਸ ਕਤਰੇ (ਕਲੌਟ) ਦੇ ਬਰੇਨ ਵਿੱਚ ਜਾਣ ਕਰਕੇ ਯੁੱਧਵੀਰ ਦੇ ਬਰੇਨ ਦੀ ਵਰਕਿੰਗ ਜ਼ੀਰੋ ਹੋ ਗਈ ਹੈ। ਉਸਦੇ ਬਾਕੀ ਸਾਰੇ ਸਰੀਰ ਦਾ ਸਕੈਨ ਕੀਤਾ ਹੈ ਜਿਸ ਤੋਂ ਪਤਾ ਲੱਗਾ ਹੈ ਕਿ ਉਸਦੇ ਬਾਕੀ ਸਭ ਅੰਗ ਬਿਲਕੁਲ ਸਹੀ ਕੰਮ ਕਰ ਰਹੇ ਹਨ ਪਰ ਸਿਰਫ਼ ਦਿਮਾਗ ਦੇ ਕੰਮ ਛੱਡ ਜਾਣ ਕਰਕੇ ਉਹ ਹੋਸ਼ ਵਿੱਚ ਨਹੀਂ ਹੈ। ਇਸ ਵਕਤ ਹਸਪਤਾਲ ਵਿੱਚ ਗਿੱਪੀ ਗਰੇਵਾਲ ਅਤੇ ਨਿਰਮਲ ਜੌੜਾ ਤੋਂ ਇਲਾਵਾ ਹਰਭਜਨ ਮਾਨ ਅਤੇ ਸ. ਬਲਵੰਤ ਸਿੰਘ ਰਾਮੂੰਵਾਲੀਆ ਮੌਜੂਦ ਹਨ ਉਹਨਾਂ ਨੇ ਸਮੂ੍ਹ ਪੰਜਾਬੀਅਤ ਨੂੰ ਅਪੀਲ ਕੀਤੀ ਹੈ ਕਿ ਉਹ ਕਲੀਆਂ ਦੇ ਬਾਦਸ਼ਾਹ ਸ੍ਰੀ ਕੁਲਦੀਪ ਮਾਣਕ ਜੀ ਜਿੰਨ੍ਹਾਂ ਨੇ ਆਪਣੇ ਗੀਤਾਂ ਰਾਹੀਂ ਪੰਜਾਬੀਆਂ ਦਾ ਮਨੋਰੰਜਨ ਕਰਨ ਦੇ ਨਾਲ-ਨਾਲ ਪੰਜਾਬੀਆਂ ਦੀ ਖ਼ੈਰ ਮੰਗੀ ਹੈ ਉਹਨਾਂ ਦੇ ਇਕਲੌਤੇ ਇਸ ਹੋਣਹਾਰ ਫ਼ਰਜ਼ੰਦ ਦੀ ਸਿਹਤਯਾਬੀ ਲਈ ਦੁਆਵਾਂ ਕਰਨ ਨਾ ਕਿ ਵਾਰ-ਵਾਰ ਫ਼ੋਨ ਕਰ ਕੇ ਇਹ ਜਾਨਣ ਦੀ ਕੋਸ਼ਿਸ਼ ਕਰਨ ਕਿ ਉਹ ਇਸ ਹਾਲਤ ਵਿੱਚ ਪਹੁੰਚਿਆ ਕਿਵੇਂ ਹੈ।