panjabiye

ਜਗਨਨਾਥ ਪੁਰੀ ਤੇ ਕਦੇ ਸ਼ਹਿਰ ਮੱਕਾ
ਬਾਬਾ ਜਿੱਤਿਆ ਜਿੱਥੇ ਜ਼ਿਰਾਹ ਹੋਵੇ
ਇਸ਼ਕ ਤੈਰਦਾ ਨਹੀੰ ਸਿਰਫ ਕੱਚਿਆਂ ਤੇ
ਆਰਿਆਂ ਹੇਠ ਵੀ ਏਹ ਜ਼ਿਬਾਹ ਹੋਵੇ
ਨਿੱਜ ਜੰਮੜੇ ਪਿਓ ਦੀ ਫੜ੍ਹਨ ਦਾਹੜੀ
ਜਿਓੰਦੇ ਜੀਅ ਫੇਰ ਬੰਦਾ ਸਵਾਹ ਹੋਵੇ
ਭੈਣ ਭਰਾ ਨੂੰ 'ਬਰੋ' ਤੇ 'ਦੀ' ਕਹਿੰਦੇ
ਕੌਣ ਪੰਜਾਬੀਏ ਨੀਂ ਖੈਰ ਖਵਾਹ ਹੋਵੇ
ਦਿਲ ਤਿੜਕੇ ਨੂੰ ਵੈਦ ਜਵਾਬ ਦੇਜੇ
ਪਾਟੇ ਚੰਮ ਦੀ ਤਾਂ ਸੌ ਦਵਾ ਹੋਵੇ
ਘਰ ਘਰ ਫੇਰ ਐਸੇ ਪੁੱਤ ਜੰਮਣ
ਦੁੱਲੇ ਊਧਮ ਜਿਹਾ ਸੁਭਾਅ ਹੋਵੇ
ਸਾਰਾਗੜ੍ਹੀ ਤੇ ਗੜ੍ਹੀ ਚਮਕੌਰ ਚੇਤੇ
ਮਰਕੇ ਜਿਓਣ ਦਾ ਜਿੱਥੇ ਚਾਅ ਹੋਵੇ
ਸਾਡੀ ਕੌਮ 'ਚ ਘੁੱਦੇ ਥਬ੍ਹਾਕ ਬਣਜੇ
ਇੱਕੋ ਆਗੂ ਤੇ ਇੱਕੋ ਰਾਹ ਹੋਵੇ
ਵਿਛੋੜ ਸੁੱਟਿਆ ਯਾਰਾਂ ਪਰਿਵਾਰਾਂ ਨੂੰ
ਦਰਿਆ ਸਰਸਾ ਭਾਵੇਂ ਝਨਾ ਹੋਵੇ
 
Top