ye adaa-e-beniaazi tujhe bewafaa mubaarak

gham-e-aashiqi se keh do raah-e-aam tak na pahunche
mujhe Khauf hai ye tohmat mere naam tak na pahunche

main nazar se pee raha tha to ye dil ne bad-dua di
tera haath zindagi bhar kabhi jaam tak na pahunche

nayi subah par nazar hai magar aah ye bhi darr hai
ye sehar bhi rafta rafta kahin shaam tak na pahunche

unhe apne dil ki Khabren mere dil se mil rahi hain
main jo unse rooth jaaun to payaam tak na pahunche

ye adaa-e-beniaazi tujhe bewafaa mubaarak
magar aisi berukhi kya ke salaam tak na pahunche