usee ke seene mein gadd chuka hai.

Ye meri ghazlein,ye meri nazmein
tamaam teri hikaayatein hain

ye tazkare tere lutf ke hain
ye sher teri shikaayatein hain
main sab teri nazr kar raha hoon
ye unn zamaano'n ki sa'atein hain

jo zindagi ke naye safar mein
tujhe kisi waqt yaad aayein
to ek-ek harf jee uthega
pehan ke anfaas ki qabaaein
udaas tanhaiyo'n ke lamhe
mein naach uthengiye apsaraaein

mujhe tere dard ke alaava bhi
aur dukh thhey ye maanta hoon
hazaar gum thhey jo zindagi ki
talaash mein thhey ye jaanta hoon
mujhe khabar thi ki tere aanchal mein
dard ki rett chhaanta hoon

magar harek baar tujhko chookar
ye rett rang-e-hina bani hai
ye zakhm gulzar ban gaye hain
ye aah-e-sozaa'n ghata bani hai

ye dard mauj-e-saba hua hai
ye aag dil ki sada bani hai
aur ab ye saari mata-e-hasti
ye phool ye zakhm sab tere hain
ye dukh ke nauhe,ye sukh ke nagme
jo kal mere thhey wo ab tere hain
jo teri qurbat teri judaai
mein kat gaye roz-o-shab tere hain

wo tera shaayar tera muganni
wo jiski baatein ajeeb si thee'n
w jiske andaaz khusurva na thhey
aur adaayein gareeb si thee'n
wo jiske jeene ki khwaahishein bhi
khud uske apne naseeb si thee'n

na pooch uska ki wo deewana
bahot dino ka ujad chuka hai
wo kohkan to nahi tha lekin
kadi chattano se ladd chuka hai
wo thak chuka tha aur uska tesha
usee ke seene mein gadd chuka hai.