tum se to koi raah nikali nahin jaati

aankhoon se meri is liye lali nahin jati
yadoon se koi raat jo khaali nahin jati

ab umer na mosam na wo rastay k wo pal'ttay
is dil ki mager kham khayali nahin jati

mangay tu ager jaan bhi hans ker tujhay de dain
teri to koi baat bhi taali nahin jati

aaye koi aa ker yeh teray dard saMbhalay
hum se to yeh jageer sambhali nahin jati

maloom hamain bhi hain buhat se teray qissay
per baat teri hum se uchali nahin jaati

hum'raaah teray phool khilati thi jo dil main
ab shaam wohi dard se khaali nahin jati

hum jaan se jayeen gay tabhi baat banay gi
tum se to koi raah nikali nahin jaati