kisi bhi aur se mansoob mat karna

suno!
meri kitaab-e-dil ko
tum tarteeb dete waqt
bus ye kaam kar lena
ke iski her ibaarat mein
jahaan aansu nazar aaye
wahaan ek lafz "jugnu" ko
saleeqe se saja dena aur "aansu" ko hata dena
agar hon tazkare is mein
wafa ya bewafai ke
inhe aksar mita dena
ke in bekaar kisson ko
paziraayi nahi milti
magar jab marhalaa aaye
ise mansoob karne ka
to phir zehan mein rakhna
mere jazbon ki duniya ka hawala teri soorat hai
meri tareek raahon ka ujala teri soorat hai
mujhe maayus mat karna
mere shero ki ye duniya
kisi bhi aur se mansoob mat karna